«قاشاندا حالىقپەن بىرگە ويلاپ، بىرگە ىستەيىك»

    − جۇڭگو كوممۋنيستىك پارتياسىنىڭ ميلليارد حالىقتى جۇڭگو ارمانىن ىسكە اسىرۋعا باستاۋ جولىنداعى ساياسي قاسيەتى مەن كۇش قاينارى     تاريحتىڭ جاڭعىرىعى ءاماندا قۇلاقتى تۇندىرادى.     «حالىقتىڭ كوركەم تۇرمىسقا دەگەن تالپىنىسى − ءبىزدىڭ كۇرەس نىسانامىز». 2012 - جىلى 15 - قاراشادا ج ك پ ورتالىق كوميتەتىنىڭ باس شۋجيى بولىپ سايلانعان شي جينپيڭ جۇڭگولىق جانە شەتەلدىك تىلشىلەرمەن كەزدەسكەندە، 1500 ارىپتەن اساتىن لەكسياسىندا «حالىق» دەگەن ءسوزدى 19 رەت تىلگە الدى.     سونان بەرگى 5 جىلدا، «حالىق» قاشاندا شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ ەل باسقارۋىندا ماڭىزدى ورىن الىپ، قاشاندا ءبىرقاتار كەلەلى ستراتەگيالىق شارا، ماڭىزدى باعىت - ساياسات، ماڭىزدى قىزمەت بارىسىمەن ساباقتاسىپ كەلەدى.     پارتيا 19 - قۇرىلتايى اشىلۋ الدىندا تۇر. 89 ميلليون مۇشەسى بار الەمدەگى ەڭ ءىرى ساياسي پارتيا ءبىر ميلليارد 300 ميلليون حالىققا باسشىلىق ەتىپ، جاپپاي دوڭگەلەك داۋلەتتى قوعام قۇرۋدىڭ شەشۋشى جەڭىسىنە ۇمتىلىپ، سوتسياليستىك وسىزاماندانعان مەملەكەت قۇرۋدىڭ تىڭ ساپارىنا قادام تاستادى.     26 - شىلدەدە باس شۋجي شي جينپيڭ بۇكىل پارتياعا بىلاي دەپ تەرەڭ ويلى ۇندەۋ تاستادى: «قاشاندا حالىقپەن بىرگە ويلاپ، بىرگە ىستەۋگە كەپىلدىك ەتىپ، جۇڭگو حالقىنىڭ ۇلى ارمانى جۇكتەلگەن اق كەمەنىڭ تولقىن جارا ىلگەرىلەپ، جارقىن جاعالاۋعا جەڭىسپەن تۇمسىق تۇزەۋىنە نۇسقاۋشىلىق ەتەيىك».     عاسىرعا جۋىق ۋاقىتتان بەرى شەككەن جاپا، جەتكەن تابىستاردان تۇيگەنىمىز تەك پارتيامىز قاشاندا حالىقتى وزەك ەتۋگە تاباندى بولىپ، قاشاندا حالىقپەن بىرگە ويلاپ، بىرگە ىستەسە، ءسوز جوق، جەڭىستەن ءتىپتى زور جەڭىستەرگە جول تارتا بەرمەكپىز!     جۇڭگو كوممۋنيستىك پارتياسى نە ءۇشىن ىسكەر     − «قاشاندا حالىقپەن بىرگە ويلاۋ، بىرگە ىستەۋ» − شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ ەل باسقارۋداعى ايقىن ساياسي قاسيەتى، «جۇڭگونىڭ جونگە سالۋداعى» «ساياسي سىرى»     ا ق ش - تىڭ لاس - ۆيگاس قالاسىندا 1 - قازان كۇنى مىلتىق اتىلىپ، 59 ادامنىڭ جانىن جالمادى.     سوڭعى جىلدارى، باتىستاعى كەي ەلدەردە قوعامدىق ءتارتىپ بۇزىلىپ، ەكونوميكا ەڭسە كوتەرە الماي، ساياسي جاڭجال ءورشىپ، قوعامنىڭ جىگى اشىلا ءتۇستى... باتىستىق ۇلگى اۋىر سىنعا تاپ بولدى.     ونىمەن ايقىن سالىستىرما جاساپ، پارتيا 18 - قۇرىلتايىنان بەرى جۇڭگونىڭ ەكونوميكالىق كۇشى، عىلىم - تەحنيكا كۇشى، حالىقارالىق ىقپالى كۇننەن - كۇنگە بيىكتەن - بيىككە كوتەرىلىپ كەلەدى.     «باتىستىڭ بىلىقپالىعى مەن جۇڭگونىڭ جونگە سالۋى» استارىندا قانداي سەبەپتەر بار دەگەن ساۋال كوپ ادامدى ويعا باتىرماي تۇرمادى.     «جۇڭگو كوممۋنيستىك پارتياسىنىڭ قاشاندا حالىقپەن بىرگە ويلاپ، بىرگە ىستەۋى − پارتيانىڭ سيپاتى مەن باستى ماقساتىنىڭ كورىنىسى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ ەل باسقارۋداعى ايقىن ساياسي قاسيەتى، مىنە بۇل جۇڭگو كوممۋنيستىك پارتياسىنىڭ نە ءۇشىن ىسكەر بولا الاتىندىعىن شەشۋشى سىرى»، - دەدى ورتالىق پارتيا مەكتەبىنىڭ پروفەسسورى شين ميڭ.     شي جينپيڭ جولداستى ۇيتقى ەتكەن پارتيا ورتالىق كوميتەتى ەل باسقارۋدىڭ 5 جىلدان بەرگى امالياتى ارقىلى پارمەندى جاۋاپ قاتتى.     − پارتيانى جاپپاي قاتاڭ جونگە سالىپ، حالىق جۇرتشىلىعىمەن ەتەنە بايلانىستى ساقتاۋ ارقىلى حالىقتىڭ قالاۋىنا قول جەتكىزدى.     5 جىلدان بەرى، جەمقورلىققا قارسى جۇرگىزىلگەن تاباندى كۇرەس 60 نەشە جىلدان بەرى بيلىك باسىندا بولىپ كەلگەن ءىرى پارتيانىڭ مەملەكەتتى كوركەيتۋ جولىندا قۇلشىنۋعا بەل بۋعان بەكىمىن ايگىلەدى؛ ستيل قۇرىلىسىنىڭ بۇرىن مۇلدە بولماعان قاتاڭ جاعدايى شاڭىراق كوتەرگەنىنە 90 جىلدان اسقان ءىرى پارتيانىڭ اۋەلگى ماقساتتى ۇمىتپاعان سانالىلىعىن كورسەتتى.     جەمقورلىققا قارسى كۇرەستە، ورتالىق ءتارتىپ تەكسەرۋ كوميتەتى ورتالىق كوميتەت باسقاراتىن كادرلاردان 280 نەشە ادامنىڭ ءىسىن قاراپ، تەكسەردى، جوۋ يۇڭكاڭ، بو شيلاي، شۇي سايحۋ، گو بوشيۇڭ، سۇن جىڭساي، ليڭ جيحۋا قاتارلى كەزىندە پارتيا، ۇكىمەت، ارميا سالاسىندا ماڭىزدى قىزمەتتە بولعان جەمقورلار ىركەس - تىركەس «اتتان جىعىلدى».     جەمقورلىققا قارسى تەگەۋرىندى كۇرەستىڭ ۇلكەن دابىرا تۋدىرارى انىق ەدى. باس شۋجي شي جينپيڭ: ونى سالماقتامادىق ەمەس. ءبىراق، ءبىز پارتيامىزدىڭ باستى ماقساتى مەن بورىشىن، حالىقتىڭ تىلەگىن ەسەپكە الدىق، - دەدى.     − رەفورمانى جاپپاي تەرەڭدەتىپ، حالىق جۇرتشىلىعىنىڭ تابىس سەزىمىن ۇلعايتۋ ارقىلى حالىقتىڭ جىگەرىنە دەم بەردى.     ۇكىمەت شيپاحانالارى رەفورماسىن تەرەڭدەتىپ، وتباسى شيپاگەرىنىڭ كەلىسىمشارت بويىنشا قىزمەت كورسەتۋىن ىلگەرىلەتتى؛ الەمدىك ماڭداي الدى ۋنيۆەرسيتەت پەن الدىڭعى قاتارلى پاندەر قۇرىلىسىن ءبىر تۇتاس ىلگەرىلەتىپ، اۋىل - قىستاق وقۋ - اعارتۋىنا ءمان بەردى؛ قالا، اۋىلداردىڭ نوپوس ءتۇزىمىن بىرلىككە كەلتىرىپ، تۇرعىندار كۋالىگى ءتۇزىمىن جاپپاي اتقاردى ...     ءبىرقاتار كەلەلى رەفورما شارالارى شەشەك اتىپ، جەمىس بەرىپ، رەفورمانىڭ ۇلەس پايداسى بۇقارانىڭ ومىرىنە ءتىپتى كوپ يگىلىك اكەلدى.     − مەملەكەتتى جاپپاي زاڭمەن جونگە سالىپ، حالىق جۇرتشىلىعىنا ادىلدىك پەن اقيقاتتى سەزىندىرۋ ارقىلى حالىقتىڭ ەركىن جۇمىلدىردى.     1995 - جىلى 22 جاستاعى نيە شۋبيڭ وبالدى ءولدى؛ 2016 - جىلى جەلتوقساندا ەڭ جوعارى حالىق سوتى مەكەمەسىنىڭ 2 - كوشپەلى سوتى ونى قىلمىسسىز دەپ جاريالادى.     2013 - جىلدان 2016 - جىلعا دەيىن، ءار دارەجەلى حالىق سوتى مەكەمەلەرى زاڭ بويىنشا 3718 ايىپكەردى قىلمىسسىز دەپ جاريالادى.     قىلمىستىق ىستەر ارىز - شاعىم ءتۇزىمى رەفورماسى جەدەل ىلگەرىلەتىلدى، «دەلو تۇرعىزۋ، ارىزدانۋ، اتقارۋ قيىن بولۋ» كىناراتتارى بىرتە - بىرتە شەشىلىپ كەلەدى... ءادىليا ءتۇزىمى رەفورماسى كەدەرگىلەردى الاستاپ، ادىلدىك پەن اقيقات كۇن كوزىندەي جارقىرادى.     − جاپپاي دوڭگەلەك داۋلەتتى قوعام قۇرۋدا بىردە - بىرەۋدىڭ كوشتەن قالماۋىنا كەپىلدىك ەتۋ ارقىلى، حالىق جۇرتشىلىعىنا يگىلىك اكەلدى.     كاڭباۋ اۋدانىنىڭ باتىس يۇيفايىڭ قىستاعىنا العاش بارعاندا سەزىنگەن «ىزعارى» حىبەي ولكەلىك مەملەكەتتىك سالىق مەكەمەسىندەگى ۋاڭ جيانپيڭنىڭ ءالى ەسىندە، نولدەن تومەن 30 سەلتسي گرادۋس سۋىق، ال قىستاق تۇرعىندارىنىڭ كوزقاراسى سۇيەكتى قارىعان بوراننان بەتەر ەدى: «قاراڭدار، بۇل كادرلار جامباسى جەر يىسكەمەستەن تايىپ تۇرادى ءالى».     كوز بايلاندى، قىستاقتى كوزگە تۇرتسە كورگىسىز قاراڭعىلىق باستى. ۋاڭ جيانپيڭ كۇن ەنەرگياسىمەن جۇمىس ىستەيتىن 10 كوشە شامىن ساتىپ اكەلدى. شام جانىپ ەدى، قىستاق تۇرعىندارىنىڭ جۇرەگىندەگى شامشىراق تا جاندى. «كەدەيلەردى سۇيەمەلدەۋ دەگەنىمىز پارتيالى كادرلاردىڭ بۇقارا كوڭىلىندەگى جاعىمدى بەينەسىن جاساۋ دەگەن ءسوز»، - دەيدى ۋاڭ جيانپيڭ.  حالىقتىق تۇرعى − جۇڭگو كوممۋنيستىك پارتياسىنىڭ ماڭگىلىك ءتۇبىرلى ساياسي تۇرعىسى، ماركستىك ساياسي پارتيانى باسقا ساياسي پارتيالاردان ايىرىپ تۇراتىن ماڭگىلىك ايقىن بەلگى.     ورتالىق پارتيا مەكتەبىنىڭ پروفەسسورى جۋ ليڭجۇن بىلاي دەدى: پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى ماركسيزمنىڭ يدەيالىق جاۋھارىن يگەرىپ، حالىققا قىزمەت ەتۋ باستى ماقساتىن ىسكە اسىرىپ، حالىقتى وزەك ەتۋ يدەياسىنان جازباي، حالىقپەن بىرگە ويلاپ، بىرگە ىستەپ، تاريحي مۇعجيزاعا جەتتى.
جاۋاپتى رەداكتور:سايراش تۇرارجان قىزى